ESTE CONTO ESTÁ BASEADO NA TÉCNICA "QUE OCORRERÍA SE" DE GIANNI RODARI.
QUE OCORRERÍA
SE ME CONVERTESE NUN GLOBO?
Unha mañá de verán, cando espertei, en lugar de notar a miña cama brandiña,
quente e suave coma tódolos días, comecei a notar a suave brisa do vento, como
se eu fose arrastrada por el, o canto dos paxaros …. Cando abrín os ollos,
descubrín que me convertera nun globo! Era grande e vermello e estaba
sobrevoando a miña cidade. Primeiro pensei que estaba soñando, xa que aquilo
non era posible, pero pronto descubrín que era real.
Durante días, sobrevoei numerosas cidades e países, estiven nas montañas
máis altas, vin os lugares máis marabillosos do mundo e enfronteime a numerosos
perigos típicos dun globo, como intentar non ser picado por un paxaro, aguantar
as altas temperaturas do sol, non rozar as cimas das montañas máis afiadas ou as
copas das árbores …
Nestes días estiven tan entretida viaxando dun lugar a outro do planeta,
que nin me acordei da miña casa, a miña familia, os meus amigos, a escola …
Pero pronto comecei a estrañalos, cada vez máis, e comecei a desexar con
tódalas miñas forzas volver a converterme en nena, xa que, se seguía sendo un
globo, nunca máis os volvería a ver.
Unha noite despexada na que resplandecían as estrelas e había unha gran lúa
chea no alto do ceo, sentín como me quedaba durmida e era arrastrada pola brisa
do vento dun xeito distinto ó que o facía a diario nos últimos días. Á mañá
seguinte espertei coa voz da miña nai chamándome e cun agradable olor a
tostadas … era sábado e, coma todos eles, iamos visitar aos meus avós. Parecía
que non transcorrera ningún tempo dende a última vez que estivera na miña cama,
todo continuaba igual, polo que … sería real aquela experiencia, ou trataríase
do típico soño fantástico? Iso nunca o saberemos.
Ningún comentario:
Publicar un comentario